وبالرّغم من كل الظروف السيئة في بلدنا

بتحس بالأمل ..!

بتحس بيهو فعلاً لما تشوف شبابنا اليوم مواصلين في رسالتهم بكل تفاني، متفقدين حال بعض، و واقفين في حوائج أخوانهم، شايلين جوة قلوبهم أماني كبيرة أهمها إنهم فعلاً يكونوا طلّاب واعين ومؤثرين على مَن حولهم في المجتمع .

الصور المرفقة بتذكرنا بيوم من أيام الأمل و المحبة والإخاء، وهي صور لملتقى تكافل السنوي، الملتقى الي بتلقى فيهو الناس دي كلها اتلمّت وجات بحماس الدنيا عشان تقابل بعض وتبِل الشوق .

في الملتقى السنوي كل التفاصيل بتذكرك وتقول ليك انو فعلاً (حياتنا الحلوة) هي الي عشناها في العمل الطوعي دا!🤍
بتعرف كدا لما تلقى زول ليهو أكتر من عشرة أو حداشر سنة جايي الملتقى عشان بس يسلّم على أخوانه الصغار يوصّيهم ويطيّب بي خاطرهم ويفيدهم بخبراته وتجاربه..
بتعرف معنى الحياة الحلوة لما تلقاهم بيرددوا في شعارهم الجميل :
“التقى جيل البطولات بجيل التضحيات”!

بتعرف كدا لما تسمع قصصهم وحماسهم نهاية البرنامج، فبيبقى كل زول فيهم مادّي يدو (بالساهلة بس) عشان يكملوا مشوارهم وما ينقطع ليهم خِير .
في الملتقى كل تكافلي فينا بيحس بروح الانتماء للمنظمة، ففي ساعة زمن واحدة بيرسمو الكثير من الخطط البتخليهم يتجاوزوا كل العقبات الواقفة في طريقهم عشان يبنوا بلدنا وتبنيهم .

في الملتقى بنشوف الفرحة في وشوش أمهاتنا وآبائنا لما يعرفوا أولادهم قدموا شنو، وانجزوا شنو خلال السنوات الفاتت، بتزدحم المشاعر جوّاهم لما يشوفو ولدهم فيهو بذرة خير.. وحب الخير للغير

كل سنة كان بيتجدد اللقاء لهدفنا الأول ورسالتنا الأسمى، فبيكون الملتقى برنامج أكتر من رائع والإحساس بالجد ما بتوصف لي ناس “لمّاها أساساً عمل الخير”!🤍

حتقيف أصوات الرصاص -بإذن الله- وحنتقابل تاني وحنصحى بدري نجهز لبساتنا ومشاعرنا عشان نجي الملتقى ويا عِز من لَقى !🔥
أدخلوا على الصور وعِيدوا الذكريات الحلوة.. و ورونا في الكومنتات شنو الجاء على بالكم أول ما سمعتو كلمة “الملتقى”🤍

و ختامًا طبعاً ما تنسوا بلدنا في الأيام المباركة دي من الدعوات الطيّبات، اللهم الأمن والسلام لسودان الخير وأهله حيثُ كانوا